షిర్డీ సంస్థాన్ ఇవ్వనప్పుడు... టిటిడి ఎందుకు ఇవ్వాలి?

టిటిడి అనుబంధ శ్రీవాణి ట్రస్ట్ నిధులను సాయిబాబా ఆలయాల నిర్మాణానికి వినియోగించబోమని ఏపీ దేవాదాయశాఖ మంత్రి ఆనం రామనారాయణ రెడ్డి చేసిన వ్యాఖ్యలు రాష్ట్ర రాజకీయ, ఆధ్యాత్మిక వర్గాల్లో చర్చకు దారితీశాయి. అయితే ఈ వివాదంలో ఇప్పుడు మరో కోణం తెరపైకి వచ్చింది.

షిర్డీ సాయి సంస్థాన్ అయోధ్య శ్రీరామ మందిర నిర్మాణానికి విరాళం ఇవ్వనప్పుడు, టిటిడి నిధులను సాయి ఆలయాల నిర్మాణానికి కేటాయించాలని డిమాండ్ చేయడం ఎంతవరకు సమంజసం? అనే ప్రశ్నను పలువురు భక్తులు, హిందూ సంఘాల కార్యకర్తలు లేవనెత్తుతున్నారు.

వారి వాదన ప్రకారం టిటిడి నిధులు సాధారణ ప్రభుత్వ నిధులు కావు. కోట్లాది మంది భక్తులు శ్రీ వెంకటేశ్వర స్వామివారి సేవలు, హిందూ ధార్మిక కార్యక్రమాలు, ఆలయ పరిరక్షణ కోసం సమర్పించిన విరాళాలే. అందువల్ల ఆ నిధులను ఎక్కడ వినియోగించాలన్నది టిటిడి, దాని అనుబంధ ట్రస్టుల విధానాల ప్రకారమే నిర్ణయించాల్సి ఉంటుందని చెబుతున్నారు.

ఈ సందర్భంగా అయోధ్య శ్రీరామ మందిర నిర్మాణాన్ని ఉదాహరణగా ప్రస్తావిస్తున్నారు. దేశవ్యాప్తంగా అనేక సంస్థలు, పారిశ్రామికవేత్తలు, సాధారణ భక్తులు రామమందిర నిర్మాణానికి విరాళాలు అందించినప్పటికీ, షిర్డీ సాయి సంస్థాన్ నుంచి విరాళం ప్రకటించలేదు. అప్పుడు సాయి సంస్థాన్ నిర్ణయాన్ని గౌరవించిన వారు, ఇప్పుడు టిటిడి నిర్ణయాన్ని ఎందుకు ప్రశ్నిస్తున్నారని వారు అడుగుతున్నారు.
షిర్డీ సంస్థాన్‌కు తన నిధులను ఎక్కడ ఖర్చు చేయాలో నిర్ణయించే స్వేచ్ఛ ఉన్నట్లే, టిటిడికీ అదే హక్కు ఉండాలి. ఒక ట్రస్ట్ నిర్ణయాన్ని గౌరవిస్తూ, మరో ట్రస్ట్ నిర్ణయాన్ని వ్యతిరేకించడం ద్వంద్వ ప్రమాణాలకు నిదర్శనం కాదా?" అని ప్రశ్నిస్తున్నారు.

మరోవైపు సాయిబాబాను కోట్లాది మంది హిందువులు ఆరాధిస్తున్నారని, దేశంలోని అనేక సాయి ఆలయాల్లో హిందూ సంప్రదాయ పద్ధతుల్లోనే పూజలు జరుగుతున్నాయని మరో వర్గం వాదిస్తోంది. అందువల్ల సాయి ఆలయాలను పూర్తిగా హిందూ ఆధ్యాత్మిక సంప్రదాయం వెలుపలగా చూడటం సరైంది కాదని అభిప్రాయపడుతోంది.

ఈ నేపథ్యంలో అసలు చర్చ సాయి ఆలయాలకు నిధులు ఇవ్వాలా వద్దా? అన్న దాని నుంచి ట్రస్ట్ నిధుల వినియోగంపై నిర్ణయం తీసుకునే స్వాతంత్ర్యం ఎవరికైనా సమానంగా ఉండాలా లేదా? అనే ప్రశ్న వైపు మళ్లుతోంది.

ప్రస్తుతం ఈ అంశంపై భక్తులు, ధార్మిక సంస్థలు, సామాజిక మాధ్యమాల్లో విస్తృత చర్చ కొనసాగుతోంది. టిటిడి నిర్ణయం సరైందా కాదా అన్నది పక్కన పెడితే, షిర్డీ సంస్థాన్‌కు ఉన్న స్వేచ్ఛ టిటిడికి ఉండకూడదా? అనే ప్రశ్న మాత్రం ఈ వివాదంలో ప్రధాన చర్చనీయాంశంగా మారింది

Posted on 14 Jul 2026 03:44 AM